N.B.: il dialetto usato risente delle influenze istro-venete dovute al luogo di nascita dell' autore e alla sua permanenza a Trieste per 22 anni. Si tratta però, sempre e comunque, di dialetti veneti, che vengono usati - sia chiaro - senza alcuna intenzione autonomistica e tanto meno "devolutiva", anzi!

Prima (nei tempi dei tempi, o, come che i disi a Trieste, “soto Marco Caco”) un poareto che se trovava a gaver bisogno de qualcossa, spesso el ghe domandava quel che ghe serviva al primo che el catava, e quel ghe dava a gratis un fià de acqua, una merendina, do sorsi de cocacola, o qualcossa che ghe vanzava.

Ma el saveva che un doman anca lù stesso, se el gavessi 'vu bisogno, el gavaria trovà quel che ghe serviva.

Dopo xe vignui i ”raporti sociali” e cussì i ga' scuminzià a no fidarse più, e un studioso de Conomia ga' dito: “libero mercato: gnente par gnente!”.

Prima ancora ghe gera solo la fameia, cioè do' persone, quasi sempre un masc'io e na femena, e, in sto caso, anca fioi, po' xe vignuda anca la tribù.

Lù (Gigi) 'ndava a caccia, ela (Franceschina, Nina per i amighi) la ingrumava fonghi, sparesi, bruscandoli, radicieto, fragole, lamponi, miel, e tuto quel che ghe capitava.

I magnava sta carne meza crua e sti fruti spesso verdi o amari.

Ela conzava la pele de le bestie che lu' ciapava, la fazeva marmelate col miel, lù schegiava la selce per far ponte de frecce e cortelini.

Tante volte sta roba ghe vanzava: qualche cortelin in più perché i gaveva trovà de le selci su la riva dela Piave (che ancora no se ciamava cussì né la gera “sacra ala patria”, anca perché ancora no ghe gera né patria né stato, né servi né padroni).

Sicome i fioi de Nina e Gigi gera sai golosi e i ghe fazeva sempre fora tuta la marmelata, lori, co' sta roba vanzada i andava de Toni, che stava, co' la sua mugier (disemo Deborah) do grote più in là.

Deborah gera sai brava a far marmelate, perchè la gaveva ocio per le ave e la trovava senpre i favi dela miel che de le parti sue gera abondante.

“Gastu un fia' de marmelata per sti do lupi che no xe mai sazi?” ghe fazeva Nina a Deborah; “mah, forsi ancora un poca, ma sto ano go trovà poca miel, e squasi squasi no ghe ne gò gnanca per mi” diseva Deborah, che inveze gaveva chili de marmelata sconti soto el fondo del “tucul” (cussì se ciamava alora anca le nostre case, come in Africa, e qualchidun disi che anche Nina, Deborah, Gigi e Toni fussi - in efeti – neri, anca se i stava visin de la Piave, anca perchè alora no i gaveva ancora inventà la “identità veneta”).

In reltà la diseva cussì solo per far pesar de più quel che la dava e cussì domandar de più in cambio… in cambio apunto, perché el saveva che Nina e Gigi ghe gavaria dà magari qualche ponta de freccia, o una pelle de gato (de gato selvadego, se intendi!), perché lori ghe ne gaveva tante.

E alora Deborah ghe dava a Nina do' chili de marmelata in cambio de una ponta de selce o de do' pelli de gato (selvadego, se intendi!) che gaveva fato Gigi (che gera sai bravo a farle).

“In cambio”: vol dir che lori ghe dava qualcosa che ghe vansava in cambio de qualcossa altro.

Questo, come che ben anca voi savè, no xe altro che el BARATTO.

Pian pianeto la zente ga' provà a doparar sto fango (che gera dapertuto co' pioveva) e a secarlo, a cusinarlo, a far pignate; e i gà visto che la roba cota in pignata gera meio de quela rosta sul fogo, che quasi sempre gera meza crua e meza brusada (esatamente come desso co' femo el barbecue, che saria anca questo un uso importà da popoli barbari e primitivi).

Però sta invenzion dela pignata bisogneva sfrutarla, e le raìse, le zevole selvadeghe e i fruti spontanei no bastava, e alora i se gà inacorto che co' i spudava le semenze de melon o cascava qualche gran de formento o qualche osso de pèrsego, cresseva meloni e formento e pèrseghi in mezo al cortivo.

Cussì esatamente ga tacà l'agricoltura (se gera alora in epoca neolitica, che i fazeva le ponte de selce meio che prima, quando che gera el paleolitico) e questa xe stada la prima rivoluzion de l'omo, che la se ciama apunto la “rivoluzione neolitica”.

Per coltivar meio e de pì, per tagiar tuti i alberi, per far posto ai campi, per coltivar, semenar, sonar, sc'iarir, netar e masenar ghe voleva un organizasion e cussì i se ga messo insieme e là ga vù inizio la soma de tuti i nostri mali, che saria “lo stato”.

Ognidun continuava a far tute le robe sue, che ghe vigniva meio, e dopo e le baratava con quel che ghe vigniva meio ai altri; i se scambiava: “pelli, frutta, carne di animali cacciati, legna, le selci necessarie a fabbricare armi e altri utensili”, cussì dise i studiosi.

Ma no i fazeva solo l'agricoltura, ma anca i 'levava piegore, mussi, cunìci, galìne e oche e cussì la bestia (viva o morta) xe diventada el “bene fondamentale”.

Noialtri disemo, in Talian, peculato (che saria robar i soldi de tuti), e deriva dal Latin “pecus”, che vol dir piegora; disemo “capitale” che deriva squasi sicuro sempre dal Latin “capita”, cioè i capi de bestiame.

Eco, questo perché le bestie gera la ricchezza e le xe stade el primo riferimento nel baratto.

Solo che le bestie valeva soprattutto de vive e, se un ghe dava a un altro qualcossa che valeva – par esempio - un dodicesimo de piegora, bisognava coparla, e alora la valeva de manco, e i se incasinava.

Alora i ga dito: “noi sai ne interessa no solo le piegore, ma anca el bronzo, el fero, che servi per far l'aratro e semenar formento e (nati de cani, i ga scuminzià sai presto) a far spade per copar i altri e ciavarghe el formento senza far la fadigha de semenarlo…”

E el metallo (bronzo e fero sopratuto, ma per i più richi anca l'oro e l'arzento) xe diventai la misura del scanbio, anca perché gera fazile pesarli e stabilir le equivalenze, tipo: un chilo de fero val meza piegora e mezo chilo de bronzo, un chilo de arzento val quindese chili de oro e cussì via.

Ma ancora se scambiava tuto e cussì bisognava tignir inamente un saco de “dati”: quanti chili de bronzo valeva un manzo, e quanti litri de late, e quanti chili de oro, e de arzento, e quanti chili de formento, e quante cavre, e quanti vovi, e quanti litri de ogio, e un litro de ogio quante piegore, e che porzion de manzo, e quanti eti de arzento… gera de diventar mati e el più de le volte i te ciavava o sul peso o sul prezzo.

Par esempio, in Mesopotamia 300 chili de formento valeva dodese litri de ogio, siezento chili de sal, 1 chilo de rame, sinque chili de lana e sie grami de arzento; un cavron valeva zento chili de buro, una pelle de manzo, vinti pelli de agnel…

Tre cavre valeva sedese grammi de arzento, e un caval 160 grammi e cussì via.

Gera de diventar sempi, ma chi che gaveva memoria se trovava sai ben e fazeva afari come gnente.

Per far tuto più semplice i xe 'ndai in zerca de un “equivalente generale”, che podessi dar una sola tabela per i prezzi, e prima i ga scuminzià a dir: “femo tuto col bronzo”, ma no tuti gaveva bronzo, “femo co le pignate de fero!”, ma no tuti gaveva pignate de fero, "femo co' l'oro!", ma penseve se bisognava pagar un vovo co l'oro, no ghe gera balanze eletroniche per pesarghene cussì poco…

In Africa i ga tenta' co' le conchiglie, in Asia col the o co' la giada (che sarìa un minerale, no la sorela de Denis, che no saria gnanca 'na bela roba e la xe anca brutina), ma gnente, ghe voleva qualcossa de novo:

i metalli preziosi (oro e arzento) pareva el sistema più sicuro ma el peso?

Figureve quanti vovi de manco che te vigniva se el peso de l'oro no gera proprio giusto e i te pagava con un gramo de manco: una ciavada!

E alora qualche comerciante ga' pensa', ghe meto el mio sigilo sul peso e cussì ghe garantisso che xe proprio, par esempio, diese grami virgola setantacuatro.

Cussì ga' fato un tal Fanes, setezento o otozento ani prima de Cristo, a Efeso, in Asia Minore, che adesso xe Turchia, stampando sul metallo (che però no gera proprio oro, ma elettro, cioè una lega natural de oro e arzento che se trovava cussì, pronta, in'te i fiumi) el so' nome e el so' simbolo che (chissà perché, absit iniuria verbis) gera un cervo co' do belissimi corni).

Podemo dir che fussi una moneda, la prima? I dise de no, perché la moneda devi gaver qualcossa de “ufficiale”… ma eco che quasi contemporaneamente el famoso Creso, Re dela Lidia (no, no xe la sorela de Otorino, ma una region senpre de l'Asia Minore: se vedi che sti tipi de l'Asia Minore gera sai 'vanti rispeto ai altri) el ga fato anca lu' dei tochi de eletro con sora el so simbolo, cioè un leon e un toro visavì che se varda in cagnesco: anca qua corni, se vedi che i andava de moda anca a quei tempi.

Dopo, sicome la zente no se fidava massa de sto eletro che, una volta gaveva mezo oro e mezo arzento, un'altra gaveva squasi tuto arzento, i ga' deciso de far do' serie de monede, una de oro e una de arzento.

E tuti se ga' messo a far monede, sopratuto tute le cità (poleis) de la Grecia: Atene co' la suìta che gera el simbolo de la dea Atena, Egina co' la tartaruga, Corinto con Pegaso (el caval co' le ale), Creta col labirinto, Tebe col scudo, Rodi cola rosa, Efeso co' l'ape e cussì via : eco là, la fin del barato xe scuminziada cussì, ma el barato no xe mai morto, e el dura ancora, come… potrete vedere recandovi al Parco della Bissuola e prendendo uno spritz all'omonimo bar, dove si baratta prima di tutto simpatia!